SEANAMARENA, KOBO YA BASOTHO

Mehleng ya kgale ya dilemo tsa makgolo a dilemo a bo19, maYuropa a ile a tla ka dikobo tsena naheng ya Afrika Borwa jwalo ka sesupo sa ho etsa kgotso le ho qetela ho etsa dinaha tsa Afrika dikolone, moo teng Lesotho le ileng la qala ho ikemela. Kajeno dikobo tsena di aparuwa ke basotho e le tsela ya ho ikotla sefuba le ho bontsha boikgantsho ka bong ba bona le setso. Ntle le hore e aparelwa ho thibela mohatsela, le badisa-dikgomo ba e apara jwalo ka tshupiso ya hore "Ke mosotho," mme leo ke lebaka le tshwanang ho batho ba Basotho ka bongata.

Ke ka hobaneng basotho ba apara dikobo?

Mabaka ke a mangata a fapaneng a hore hobaneng basotho lefatsheng ka bophara ba apara dikobo mme le tlwaelehileng haholo ke la hore ba ithibeletsa mohatsela le serame empa a feta moo. Basotho ba apara dikobo ho bontsha hlompho, kgotso le boikokobetso ho batho ba bang. Ho feta moo; ba di apara meketjaneng ya bona ka ho fapana mme jwalo ka ha dikobo tsena ka bo tsona di fapane - e nngwe le e nngwe e aparuwa ho ya ka hore ho hlahile mofuta o jwang wa ketsahalo. Mabaka a mang a ho apara kobo e ka ba a tshwanang le ho keteka letsatsi la botjhaba leo ka Senyesemane le bitswang ka hore ke Heritage Day, le morwetsana ha ithwetse ke moo teng a e lahlelang thekeng la hae ho pata ka ho bontsha hlompho ho baholo ba hae kapa hona ho bontsha hore o lebelletse lesea. Ka mafu e aparuwa mahetleng ho bontsha hlompho le hore a seng a iketse boya batho a tsamaye hantle, bashemane ba tswang mophatong ba di apara le bona ho bontsha hore ba se ba fetile tseleng ya ho ba lokisetsa ho ba banna ba hlwahlwa.

Ha o kena botebong ba taba ena ke moo o bonang hore Seanamarena ha se kobo ya lefeela empa e tshwere ditlhaloso tse fetang moo; jwaloka ho aparuwa ha teng le hore mebala ya teng ka ho fapana le meralo ya teng e bolela eng mme e tlwaelehileng haholo ke ya leeba le bolelang 'Kgotso' mme ho tle jwalo le mebala ya teng ka ho fapana, ho na le tse ding tsa marumo hoo ho ka bolelang 'tshireletso' le tsa ditaemane ka mokokotlong tseo di bolelang 'moruo' - kaofela ha tsona di le jwalo di bohlokwa haholo ho Basotho.

Mokgwa wa ho apara dikobo

Kobo Ya Basotho E Hlwahlwa

Bobedi ba batho ba batshehadi le ba batona ha ba apare kobo ka ho tshwana. Ho latelang ke polelo e hlalosang ka botlalo hore mong ka nngwe o tlamehile kapa hona tshwanelehile ho apara kobo jwang: Batho ba batona ba e qhwaela lehetleng le ka lehlakoreng le letona mme ba e hlanollelela ka moo mmala wa yona o leng lerotho. Batho ba batshehadi ba ikhahla ka yona lethekeng, empa hona ba ho etsa ha ngata ha e ba ba ithwetse. Tsela e nngwe ya ho e apara ke ho e lahlela mahetleng a bona jwalo ka sholo ba e qopela ka lemao mme bona ba shebisa mmala o hlakileng setjhabeng.

Dikobo tsena tsa Basotho di ikgethile hobane di a makatsa e le ka nnete - di entswe ka mahlakore a mabedi ka mebala e fapaneng, ha le leng mmala wa teng o hlakile ebile o kganya; le leng lona mmala wa lona o lerotho ebile o fifetse e leng moo ho kenang taba ena ya hore bong ka bong bo apara jwang. Hodima ditsela di fapane tsa batho ho apara kobo; e le nngwe e tshwanang e leng ya mela e takilweng kobong - ka dinako tsohle motho o tlamehile ho nnetefatsa hore kobo ya hae mela ya teng e lebahane mme e shebetse hodimo ho ya fatshe e seng ka lehlakore, hoo ho bontsha kgolo.

Tse itlhomeng pele ha jwale ke hore re bona dikampani tse kgolo jwalo ka Louis Vuitton di nka meralo ya Seanamarena ho etsa diaparo tseo di ka kgahlang batho. Diaparo tsena ke tse aparuwang ke efatshe ka bophara ho kenyelleditse le makgowa a dulang dinaheng tse ka nqane mose ho mawatle.